點解要用唔同杯飲唔同酒？

玻璃杯的發明令我們能夠飲到更好味的各種酒，因為玻璃的可塑性好高，可以把杯子造成不同型狀以配合不同酒的特色。一般酒杯分為三個部分，鬰金香形杯身丶杯脚和杯底，杯腳是主要用來手執杯子的接觸㸃，要避免用手掂到杯身，影響杯中酒既溫度。呢度先介紹九款以葡萄酒為主的，威士忌和各式烈酒嘅杯都可以好唔同。

#1 氣泡酒/香檳 - 長笛杯 (Flute)

好幾十年前，在每年一度的三色台台慶上，旗袍夫人都會在一座疊高的闊口香檳杯上倒香檳，好豪氣，但其實好浪費。飲香檳或氣泡酒唔應該用闊口杯，因為闊口杯會令酒內的二氧化碳 bubbles 好快散晒，到冇晒泡既話就唔會有咁 fresh 和有氣泡在口中爆開的感覺，味道都冇咁好飲；用高而窄身的杯就唔會令香檳酒內氣泡一下子散開，可以慢慢欣賞升起幼細既泡，一串串的由下而上，而且可以升好耐，香檳酒升起的泡，散芬芳.... (林子祥嘅歌冇講錯㗎！）

#2 紅酒杯 - 波爾多紅

大部分的紅酒杯都有個大肚子，原因是要增加紅酒和空氣的接觸面，所以如果有一排唔同嘅杯放埋一齊，最大肚腩的就是波爾多紅酒杯了，因為波爾多的主要葡萄是 Cabernet Sauvignon ，以多丹寧聞名，酒同空氣接觸時亦可以令酒柔和啲。不過唔好因為杯子大就倒好多酒，只要倒到最闊身位置，令酒可以同空氣有最大嘅接觸面就可以，同時可以聞到豐富黑果和紅果的香氣。

#3 紅酒杯 - 勃根地紅

既然有波爾多紅酒杯，勃根地有専用的紅酒杯也是合理的預期，主要是要展現該區葡萄的最佳狀態。勃根地區的黑葡萄是 Pinot Noir，果皮較薄，丹寧較少，香氣較幼細優雅，所以不需要太多的空氣接觸面，因此杯子一般較淺、口較闊，方便散芬芳，這區的紅是唐唐至愛，可以好貴。

#4 白酒杯 - 波爾多白

波爾多白酒遠不及紅酒出名，是 Sauvignon Blanc 同 Semillon 混合的葡萄酒，有些 Oak 的味道，這個杯也適合用來飲一般的白酒，白酒杯一般比紅酒杯小，因為不需要特別多空氣接觸令丹寧變得柔和，只要有足夠位置輕搖杯身提溫，令雪凍既白酒同空氣接觸，有助散發不同的芳香。

#5 白酒杯 - 勃根地白

勃根地區葡萄為Chardonnay 而造的，高品質既 Burgundy 可以展現唔同葡萄田既特性，有些較多Mineral ，有些較幼滑，改變可以好 subtle，用此杯就是可以放大唔同風味，更容易感受和欣賞。

#6 強化酒 - 些厘酒杯

話明係強化酒，即係話酒精度比一般葡萄酒高，大概係15－22度之間，所以這些酒杯一般都是較細小的，一來強化酒酒精濃度高，不宜飲太多，二來較窄的杯口就不會聞到太濃烈的酒精味，而杯身細細又呈鬱金香形的向內彎，可以把果香集中在中間鼻子聞到的空間，所以就可以欣賞到各種強化酒如 Sherry 和 Port 的獨有香氣。

#7 甜酒杯

甜酒杯可以選擇杯身較細的，因為一般只㑹飲小量，唔會太膩，向內彎既弧度可加強甜酒內的花香丶蜜糖和乾果味，有時可以用強化酒杯，雖然強化酒並非100%都係甜酒。

#8 烈酒杯 - Grappa Glass

烈酒杯有唔同形狀，例如飲餐後消化酒意大利的 Grappa 可以用 Grappa Glass。杯身較小，開口較直而杯㡳形狀較圓的酒杯，圓杯可以保持酒的溫度，不會過度揮發而令高酒精把嗅覺麻痹。

#9 ISO 品酒杯

全球品酒人仕都用上同一世界標準 (The International Organisation of Standardisation ISO) 的玻璃杯來試酒，這隻杯子指定杯身高約100mm，杯座高約55mm ，杯口闊約46mm ，杯肚闊約65mm ，玻璃厚度約0.8mm，杯柱闊約9mm; 要上窄肚闊呈鬱金香形狀，肚闊可以讓酒和空氣接觸，令試者聞到香氣，上窄就是要把香氣聚焦到杯子中間。這酒杯尤其用於專業試酒人員，比較不同酒的品質，作客觀的評估，也適合一班志同道合人士，一人帶一瓶來個矇眼品酒會 ，一般情況大概只㑹倒50毫升，咁就可以有足夠空間可以搖杯令香氣溢出，而看顏色深淺時又有一個共同的呎度。