拜訪Chapel Down Winery

Chapel Down 除左係英國首相府唐寧街十號指定用黎招呼外賓嘅氣泡酒外，更贊助每年一度的兩間大學牛津和劍橋的划艇比賽，今年一月又在法國的巴黎時裝週招呼貴賓，一連串嘅市場推廣係要為品牌打好基礎，預備要成為英國氣泡酒生產者一哥，人氣將會越來越旺盛，率先認識佢哋，就有大把料同朋友分享啦。

呢個冬天，親身到訪離倫敦約二個鐘頭車程嘅英國氣泡酒 Chapel Down Winery 參觀，可以親身踏足葡萄園和到酒廠參觀，非常多謝佢哋嘅安排。

Chapel Down 位於Kent 肯特郡 Tenterden 一個叫 Small Hythe 既地方，在十五世紀時係一個繁忙既造船港口，大不列顛艦隊的好多重要船隻都係在此建造。

參觀完葡萄園同酒廠就是試酒時間，本來以為佢地只有氣泡酒，但原來亦有一般葡萄酒，呢枝 Baccus 就係意外發現，因為呢個葡萄品種本來係一個德國嘅Crossing 新品種，用了Silvaner 、Riesling 同 Müller-Thurgau去配出新品種。試過後覺得清淡易入口，可以作為簡單配餐酒，價錢非常相宜。氣泡酒 Blanc de Blancs 用100% Chardonnay 釀造，果味集中又夠酸度，非常 Clean and Crisp，另外兩款值得推介嘅就係全黑葡萄造既黑中白 Blanc de Noirs ，同 The Three Graces，兩枝都係價錢較高的優質出品，屢次獲奬而且產量有限，可以話係供不應求。

雖然英國氣泡酒對好多亞洲人仍然好陌生，但其實已經造得越來越好，而且市場前景非常樂觀，脫歐就係其中一個商機，因為英國本身就係香檳市場嘅大買家，脫歐無可避免㑹令入口商品價格上漲，他們就啱啱可以填補呢個市場空間，一來愛國，二來可以更平，論性價比就好高分，除了釀造法和香檳一樣，連土壤都係和香檳區相連嘅limestone(石灰岩)地層，所他們正在積極拓展內銷市場，包括超市同賣酒專門店都係重要推廣渠道。

仲有不能不提嘅就係佢哋既餐廳 The Swan，室內佈置非常簡樸但有品味，主要以木為主，主廚㑹經常根據當時嘅時令地道食材而轉換菜式，最重要當然可以配 Chapel Down 既酒，唔想飲葡萄酒仲可以選 Apple Cider ，都係佢哋嘅自家出品，食物方面由麵包開始就已經是自家製作，首推主菜帶子脆皮烤豬好味到...，最後，就是飽都要叫埋佢哋嘅芝士碟，Cheddar 和藍芝士都好 Creamy，仲配埋英國精造既麥餅，就真係希望可以再坐多陣飲埋杯 Brandy ！

臨走前記得唔好錯過佢哋係樓下既商店，雖然酒唔帶得幾多，但其他乾貨例如英國手造 Toffee 糖，麥餅等就唔係其他地方容易搵到，佢地而家正密鑼緊鼓起一座新既試酒館，將㑹對正葡萄園來試酒，同時可以作為更多活動場地，包括 Wedding。如果選擇夏天來，好幾小時長的黃昏日落在此試酒，唔醉都幾難！

#ChapelDown #Winesharehk